شوكت نروح للعيد ؟
الاثنين، 29 سبتمبر 2008
" شوكت نروح للعيد ؟ شوكت العيد يجينا ؟ "
.اسئلة نسمعها دائماً من الأطفال ..
.
والابتسامة تعلو وجوهنا لأننا نتذكر أيام ما كنا نحن نسأل هذه الأسئلة ذاتها !!
.العيد راح يجي .. الملابس محضرة ، وريحة الحنة فايحة من إيد البنات ، والأطفال متوترين من الفرحة ، والنوم يجافي العين ..
.الناس في الأسواق ادور عن تكملة لملابس العيد ، وتشتري البقلاوة والحلقوم ..
.وريحة الكليجة طالعة من كل البيوت ..
.الطرمات مشطوفة ، والناس فرحانة ..
.الكل فرحان بالعيد ، والكل ينتظر العيد ..
.ثم تعلن التلفزيونات أنه العيد باجر وبعد باجر ..
.شلون ؟؟
.والله الدول الفلانية عيدهم باجر ، والدول الفلانية عيدهم ورا باجر !!
.أووووووووووووف من العرب والمسلمين ، شوكت راح نتفق كليتنا على رأي واحد ؟؟
.يعني تركتوا عصر العولمة والإنترنت والموبايل ، وقررتوا كل واحد يفتي لنفسه ؟؟
.شلون لعد راح نجتمع كلنا تحت راية وحدة ، ونحارب عدو واحد ؟؟؟؟؟؟؟؟
.اجا العيد ..
.من الصبح تسمع التسابيح ، والمساجد كلها تردد :" الله أكبر .. الله أكبر .. الله أكبر .. لا إله إلا الله .. الله أكبر .. الله أكبر ولله الحمد ..........."
.لو ضيعت صباح العيد ضاع عليك العيد كله ..
.ما أعرف ليش صباح العيد إشراقته غير شكل !
.الكل بالشارع كاشخين ولابسين أحلى الثياب ، وبالنسبة إلنا بالغربة ، الهدوم اللي بالشارع من كل الجنسيات ومن كل الأشكال ..
.الكل يمشي باتجاه المسجد ..
.
الكل يجمعهم شي واحد .. الإسلام ..
.
وبعد الصلاة تبدأ الزيارات وتبدأ التليفونات ادق ، وناس تهني ناس والكل مبتسم وسعيد ....بس لحظة أشو محد زعلان على رمضان ؟؟
.محد صفن وية نفسه وفكر شلون مضى رمضان بسرعة ، وهل استغله زين لو لا ؟؟
.يتحسر الواحد لمن يشعر إنه رمضان الجاي راح يجي بس ورا 11 شهر .. يبووووووووو شكد بعيدة ..راح نكون عايشين لو لا ؟؟..
..
.
.
.
نتذكر العيد بالعراق .. واحنا اللي أبد ما ننساه ..
.
كل سنة الأهل يجتمعون في بيت الجد .. بس من يوم ما صار الاحتلال وكل واحد يعيد ببيته !
.
الزيارات صارت على الخفيف ..
.
والعزاء في كل حي ..
.
ما يدري الواحد يصبح عيد ولا هدية من أمريكا تنفجر وسط الناس لو تنزل من السما ؟!
.
إييييييييه يا عراق ...
إن شاء الله يجيك يوم وتعيّد مثل كل الناس ..
.
يجيك يوم وشوارعك ما بيها أحد غريب ..
.
يجيك يوم وتكون سعيد ..
تحية من قلب كل متهجول عراقي إلى كل مواطن عراقي على أرض الوطن ..
.
كل عام وإنتو واحنا وكل المسلمين بخير ..
.
وأيامنا وأيامكم سعيدة ..
.
.
.
ماجينا يا ما جينا
ماجينا يا ما جينا
.
حل الجيس وانطينا
.
تنطونا لو ننطيكم
.
ربنا العالي يخليكم
.
لبيت مكة يوديكم
.
يا اهل السطوح
.
تنطونا لو نروح؟؟
.
.
مع تحيات أعضاء فريق متهجولون في الغربة : أبو الحسن ، خاتون ، هارت روز ، زهرة الراوي
29 سبتمبر 2008 في 10:01 ص
و إنتي بخير يا زهرة، و العراق بخير إن شاء الله
تقبلي تحياتي
1 أكتوبر 2008 في 10:50 ص
هلالالالالالالالالالالالالالالالالالاو زهوووووره
هلالالالالالالالالالالالالالالالالالاو خاتوووووونه
اقوللكم ايامكم سعيده و عيدكم مبارك و شكرا جزيلا يا زهوره عالمبادره الحلووووه
اي والله ذكرتينا شلون العيد بالعراق
يخبل يخبل ماكو منه
شلون كلنا نجتمع ببيت جدو
و شلون جنا ننخبص بتنظيف البيت قبل العيد و الشبابيك و الطرامي و الحيطان
تصورو اني دا اشتاق لتنظيفة العيد
و شلون العزايم تصير
و على فكرة اني ما ازال اقول : شوكت نروح للعيد ؟؟
و هاي قلتها البارحه الفجر قاصدة صلاة العيد
الله يفتحها عالعراقيين ياااااا رب
و نعيد بالعراق يااااااااااا رب
2 أكتوبر 2008 في 12:40 م
أهليييييييييييييييين وسهليييييييين ..
أيامكم سعيدة إن شاء الله ، - أدري متأخرة بس بعدنا عيد فلحد يحجي -
أشكر مروركم الأنيق خاتون وروز ، وإن شاء الله عيد الجاي العراق حر ، واللمة بيه إن شاء الله ..
وبعد ما نصير متهجولون هههههههه ويصير لازم نغير اسم المدونة !
أكول روز إذا مشتاقة لتنظيفة العيد هلا بيج والله ، نرحب بكل يد عاملة إضافية :)
ترى أين أبو الحسن ؟؟ إن شاء الله خير؟ يجوز بعده معيد :)
4 أكتوبر 2008 في 1:20 ص
Wonderful!...and for you...
"love is the one who masters all things."
Mawlãnã Rumi.
5 أكتوبر 2008 في 7:01 ص
Mawlãnã Rumi
أهلاً وسهلاً بك .. حللت أهلاً ونزلت سهلاً ..
ترى ما الذي أوصل إيطاليا إلى مدونتنا ؟؟ عراقي مغترب ؟
تعذرنا لا نعرف الإيطالية وإلا كنا من قراء مدونتك التي تبدو جميلة :)
5 أكتوبر 2008 في 8:02 ص
لحظة ! هذه الإيطالية أم الفرنسية !