المتهجول الصغير
الجمعة، 26 ديسمبر 2008
جلست بجانب أخي الذي يبلغ من العمر أربع سنوات تقريباً ، وقرصت خدوده مع قزقزة من أسناني ، وقلت له: من أين اشتريت هذه الخدود ؟؟ أريدها ..
قال : لا توجد خدود مقصقصة !
تفاجأت بالرد ! والفكرة من الرد ( بصراحة تخيلت قطع لحم مجمد )
قلت له : يعني ما تنباع الخدود وحد ؟ لازم ناخذ الوجه كله ؟
قال: ماكو رؤوس مقطعة ؟؟ شنو يعني أقص راسي حتى تاخذيه !!
لم استطع إكمال الكلام .. غريبة هذه الألفاظ من هذا الطفل الصغير .. بل هي مرعبة ! لو تخيلناها حقاً ..
ترى هل تغير الزمن أم نحن الذين تغيرنا ؟؟ كيف ولماذا يفكر طفل صغير بأفكار كهذه ؟؟
هل للأخبار والمناظر على التلفاز دخل في هذا ؟؟
**************
نظر إلى السيدي وأمسكه بكلتا يديه ، فنهرته قائلة : لا مو هيجي ينمسك .. اتركه ، بعدين يخرب ..
- ليش هوه يتأذى ؟
- إي يتأذى ( قصدي يخرب )
- بس هوه ما عنده لسان ، شوفي ، هذا خشمه ( على الفتحة بالنص) ، وهذي خدوده ( على الكتابة على الجانبين ) ، بس ما عنده حلك حتى يحجي !
آني هنا صفنت ..
- إنت بس خليه ولا تمسكه ، ترا بعدين يتأذى ويبطل يحجي
- شلوووون يحجي وهوه ما عنده حلك ؟
- يحجي وية الكومبيوتر بلغة خاصة
- هاااااااااااااااا بس شلون هم لازم عنده حلك !
تذكرت حسومي من مدونة خاتون !
**************
يمشي برهومي ورا ماما في مسيرة شبيهة جداً بالبطة وصيصانها ، وهو – برهومي – يصرخ ويعوي ، فأوقفت هذه المسيرة الحثيثة ومسكت برهومي وقلت له :
- شتريد ؟ شبيك تبجي ؟؟
فأجابني بمجموعة من الكلمات الملغمطة بسبب اختلاطها بالصراخ ، فقلت له:
- إذا ما تسكت وتحجي مثل الأوادم ما أقدر أفتهم عليك .
بقال بعياط : أريد الجيمبوي !
انفرجت عيناي بشدة ! وهذا شمدريه بالجيم بوي ؟؟
فسألته :
- شنوووووووووووووو ؟؟؟ وشنية الجيم بوي ؟
قال :
- متعرفيها ؟؟ هاية لعبة مستطيلية ، بيها بباي وسيارات وينط بباي ويقتلهم .
نظرت لوالدتي التي هزت رأسها وقالت :
- وحدة اليوم جابتلهياه هدية ، والأولاد عدهم دراسة ، ومن أنطيهياه يلعبون وياه ، لذلك ضميتها .
شرحت لبرهومي الموضوع ووعدته أنه ماما راح تنطيهياه باجر، ويبدو إني جنت مقنعة لأنه سكت .
في اليوم التالي :
دخلت البيت لأجده ماسك بالجيم بوي ، قعدت يمه :
- اشرح لي شلون تعلب بيها .
بدون ما يرفع عينه :
- آني مشغول هسه بعدين أقولج شلون ، بعدين إنتي أصلاً كبيرة ، شلون تلعبين بلعبة مال أولاد ؟؟
- هسه انت معليك آني أريد ألعب ، علمني .
- شوفي ، تفتحين هاية هيجي ، وبعدين ادوسين ( إستارت ) .
آني هنا طلعت لي شخوط زرق مثل الكارتونات اليابانية ، ونزلت دمعة يم وجهي .
- شنو يابه ؟ أدوس شنو ؟
- إستارت إستارت .. شنو متعرفيها ؟؟ شكد عيب !
- زين وبعدين ، دسنا ستارت بعدين ؟؟
- بعدين ادوسين على بباي ، وبعدين تمشين وتنطين تنطين ، وتجمعين الأكل ، ( كان يطبق وهوه يشوفني ) ، وبعدين .. يبووووووووووووو فتنا بالباص ، شوفي تطلعين من الباص من هنا ، وتمشين من هنا ، وهيجي تخلص المرحلة الأولى .
عدّل كعدته وقال :
- روحي هسه ، عود من أخلص المرحلة الثالثة أصيحج تلعبين !
بصراحة بقت الشخوط والدمعة ، وبقيت أفكر ، شلون آني لمن جنت صغيرة جنت أقصى ألعابي أنه أجمع الهدوم النظيفة وأحطها بالإنجانة ، وأغسلها بدون ماي ، وبعدين أشرها على القنفات ، ثم أكويها بمكواتي البلاستيكية وأصفطها !
سبحان الله شلون الدنيا اطورت ، وكام هذا المجعوص يعرف الجيم بوي والإستارت ! عشتوا !
**************
في بيتنا لا يغلق الكومبيوتر ، فلمن أحد يريد يقوم يصيح إذا أكو احد يريده ، وطبعاً هوه أكو دور ، وأكو عراكات ، هذا رغم وجود 3 لاب توب !
(هسه عبالكم مثقفين هههههههههههههه يعني هوه ناس تسوي بحوث ، ناس تحجي وية العراق ، ناس تغش إجابات من النت ، وناس تلعب )
قمت أنا وقمت بالإعلان فإذا ببرهومي يقول :
- آني أريد أقعد .
- ليش شتريد ؟
- أريد أطبع .
- شتطبع ؟
- تؤ .. إنتي معليج .. شغل شغل .. يعني شنو ؟؟
- ها ! تفضل عيني .
وصعد على الكرسي بمشقة ، واستلم مقعد القيادة ، وحط إيده على الماوس ، وشلون ديتصرف بأهمية بحيث حسيت أنه راح ينطلق الصاروخ ، بقة شوية يجقجق منا لهنا .. وآني أراقب ، ثم اندار عليه وقال :
- أسوي شت داون ؟؟
- نعم يا خوية !! وشنو يعني شت داون ؟؟
بكل الامتعاض على وجهه :
- تؤ .. شنو يعني ؟ متعرفين ؟ يعني أسد الكوميوتر .
فعاد آني مثل الطالبة المجتهدة :
- هااااااا ، والله ؟؟ زين شلون ؟
- شوفي ، اتروحين هنانة على الأخضر ، وادوسين ...
طبعاً وآني قاعدة أراقبه وشلون ديحاول يتحكم بالماوس ، تحسرت على طفولتي اللي ضاعت وآني فرحانة أدوس على الريموت مالت التلفزيون ، بينما أطفال اليوم ممكن يطلقون صواريخ ويعرفون يمسكون الماوس والأنكى من ذلك يسوون شت داون !
هوه بالحقيقة أقوللكم ما عرف يسووي شت داون ، بس يعني تقريباً عنده الخطوط العريضة ، باجر عقبه يعلمني أسوي برنامج ، آني اللي دارسة تخصص برمجة ! والله الواحد ميدري !
**************
برهومي في بيت خالي على الغدا ، طابخين مرقة ، بس برهومي ميحب المرق ، لمن صاحته ماما على الغدا ، وصبوا له الجماعة صحن تمن ، ماما عرضت عليه تصبله مرقة ، فإذا به يقول :
- أو ماي جاد ( oh my god ) مرقة !!
مما أدى إلى نزول الشخوط الزرقة والدموع بكثرة !
- ها يابة ؟ شنو المشكلة ؟ إي مرقة .
- مو آني ما أحب المرقة.
- زين لا تاكل .
- شانكيو ! ( وهي تحوير لكلمة ثانكيو )
المزيد من الشخوط الزرقاء .
- حبيبي هاي من وين دتجيب هالسوالف ؟؟
برهومي بكل جدية :
- هذولة بالتلفزيون هيجي يقولون !
صرخت من يمي :
- غزو فكري .. احتلال .. تدمير لعقول الأطفال !!
بس سؤال .. هل أنا ممن يلقون باللوم دائماً على نظرية المؤامرة ؟ ولا هوه صدق أكو مؤامرة ؟؟
3 يناير 2009 في 12:26 ص
هههههه زهورة آني فعلاً هم جنت أريد أناقشكم هذا الموضوع، و هم عندي أشياء و قصص ويا حسومي..
فعلاً إنتي حطيتي إيدج على الجرح، الجهال هالأيام صايرين غير شكل، عندهم نزعة للعنف و عندهم جوابات غريبة و يتعلمون أمور ما تشبه اللي إحنا نعرفها،و هذي أسبابها هواية و معقدة..
تقبلي تحياتي و عاشت إيديج
4 يناير 2009 في 7:56 ص
هوه الأطفال صاروا ضحية ، بس هم احنا نكدر نخليها بصالحنا ..
يعني ما نمنع الأطفال يشوفون شنو ديصير هسه بغزة ، حتى لا يصيرون بعيدين عن الواقع ، لا ، خلي يشوفون ، وخلي يتعلمون إنهم لازم يسوون شي ، وخلي يعرفون شنو العدو ديسوي بينا حتى ياخذ حذره من يكبر ويعرف بصف منو يكون مو دايخ وبس يقلد بغباء !
تسلمين خاتون على الرد ، وبانتظار سوالفج وية حسومي :)
7 يناير 2009 في 9:49 م
لا انتي مو غلطانة هي اكو مؤامرة
هههههههههههههههههه
عاد ابو الحسن مال حاضر يجي يأيد نظرية المؤامرة، حتى كبل ما يفتهم شنو الموضوع
يابا ترة اكو انسان مفقود هل فترة، وينهة رووووز؟
هسة ادري افتهمنة امتحانات، بس قابل كاعدة بسجن انفرادي؟
بس وصلولهة تحياتي للي يكدر يتصل بيهة
اييييييي زهرة انتي اختصاصج برمجة!!!!!
لعد وينج؟ وين الانتاجات؟ شوفينة شي يمعودة، صيري هاكر واضربيلنة فد جم موقع أمريكي مثلا، على جم واحد صهيوني، وبالاخص اكو مدونة مال واحد اسمة ابو الحسن، ترة خابصنة وصدك ضوجني، ادخلي على المدونة مالتة وامسحيهة
تحياتي للجميع
هلوو خاتون وين هل غيبة
يللة ننتظرج ترة
8 يناير 2009 في 9:40 ص
ههههههههههههههه لا بالفعل أكو مؤامرة ، مو أكو بروتوكولات حكماء صهيون ؟؟ وأكو بيها إنهم يستغلون الإعلام كسلاح فتاك من اجل بناء دولة إسرائيل ؟؟
هسه مو المشكلة بالإنجليزي ، لانه هم مهم من ناحية اعرف لغة عدوك ، الأهم أنه هنا في مدارس في الدولة ، تدرس المنهج البريطاني ، وتدرس جغرافية وتاريخ بريطانيا ، ولا يعرف الطلاب شيئاً أبداً عن الدول العربية ، أما عن الدول الإسلامية فهم لم يسمعوا عن وجودها أصلاً ، وهم يتحدثون الإنجليزية مع العلم أن لغتهم العربية ضعيفة جداً جداً جداً . حسبي الله ونعم الوكيل .
روز عايشة ، جنت يمهم اليوم ، وتسلم ، لكن شلون واحد طلعوه من سجن انفرادي مدتعرف شتسوي بالعطلة ، تريد تشتغل كل دقيقة بيها :) بلكت نشوفها هنا قريب .
إيييي اختصاصي برمجة ، بس الهاكرنج ما يعلمولنياه بالجامعة ، ولا أكو إله دروس أوفيشال ، بس آني دا أحاول والله .
أما مدونة أبو الحسن ، فشبيهة ؟ خطية ديحاول كل جهده يقدم شي للامه بس صوج الناس اللي متتجاوب !